Costas gallegas

Este lenzo tamén coñecido como Enseada de Canabal, situada na Coruña, reúne compoñentes característicos da pintura paisaxística de Francisco Lloréns xa na súa etapa de plenitude. É unha vista panorámica tomada desde o alto que permite captar os matices de luz que o pintor recrea a través dos contraluces dos cantís e dos reflexos sobre a auga. Cunha paleta diáfana plasma os efectos da atmosfera difusa xenuinamente galaica. Lloréns crea unha poética subxectiva coa que busca, como os seus coetáneos da xeración do noventa e oito, a captación da esencia da paisaxe que están a plasmar. Costas galegas é a obra máis reveladora das claras xornadas da Galicia estival, na que combina a modernidade compositiva e a diversidade de matices de luz que capta e define a través dunha observación minuciosa.