El Descendimiento

Escena evanxélica que recolle o momento en que Cristo, despois de morrer, é baixado da cruz cuxo madeiro vertical ocupa aquí o centro da composición. A escena central articúlase en torno á diagonal que forma o corpo morto de Cristo que a Virxe sostén nos seus brazos e que conforma un episodio moi representado na arte relixiosa, a Piedade. Acompañan á Virxe, María Magdalena ataviada como unha dama da época renacentista, enxugándose as bágoas, e san Juan. Detrás da cruz hai un fondo de paisaxe no que se divisa ao lonxe a cidade de Xerusalén fortificada. Son características da pintura flamenga o detallismo e a minuciosidade das súas representacións, algo que se observa tanto no tratamento dos elementos da paisaxe como nas roupaxes dos personaxes.