Gigante

Figura masculina de pé sobre unha base, en actitude pensativa e mirando á fronte cos brazos cruzados. Esta escultura enmárcase nos anos oitenta durante a actividade do escultor no grupo Atlántica, que desde propostas renovadoras e rupturistas prestou atención á importancia do impulso creador persoal dos artistas. Leiro elixiu para as súas esculturas a madeira como materia principal e nesta figura ciclópea revalorízaa como valor identitario deixando á vista as trazas do traballo coas ferramentas. Formalmente achega xestos de gran forza expresiva que contribúen a dar a súa peculiar visión tráxica ou irónica da vida.