La Catedral de Saint Jacques le Mineur (Lieja)

Interior dunha igrexa gótica na que destaca a monumentalidade arquitectónica dos arcos oxivais, das vidreiras e das bóvedas de crucería. O pintor envolve o monumento nunha luminosidade de tons dourados e a súa verticalidade queda resaltada por comparación coa proporción das figuras humanas, que ademais supoñen a integración do costumismo nos distintos tipos de personaxes representados. Os grupos de fieis sitúanse ao redor dun templete gótico (o Jubé das igrexas belgas) coroado polo grupo escultórico do Calvario (desmantelado no século XVIII), que dá acceso á capela principal e coro da catedral. Obedecendo ao espírito romántico, este lenzo constitúe unha imaxe do pasado histórico medieval magnificado pola poética fantasía do pintor, así como un documento que reproduce toda unha galería de personaxes da sociedade da súa época. É un magnífico exemplo dun xénero concreto como foi o de interiores de igrexas, que xa adquirira gran auxe desde a pintura holandesa do século XVII, e que Villaamil practica con certa asiduidade. O óleo realizaríao sobre apuntamentos tomados previamente do natural, entre eles, o debuxo acuarelado que retrata o espazo do coro, conservado no Museo de Belas Artes da Coruña.