Paisaje de Granada

Formado segundo as propostas realistas da época e coñecedor do paisaxismo madrileño de Carlos de Haes, Alfredo Souto vai seguir a senda dunha paisaxe realista que asimila as influencias locais dos diferentes sitios onde se establece para exercer a súa carreira xudicial. Así, a súa estancia en Granada dá título a este retrinco de paisaxe urbana realizada en pequeno formato con asunto tan do gusto da clientela burguesa da época.  

Neste cadro apréciase a diferenza de paisaxes que pinta de Galicia respecto doutros que realiza de Andalucía. A cor desvela a súa localización meridional nos brancos da arquitectura, resaltados por esa incidencia lumínica sobre os seus encalados ou creando contrastes tonales nas zonas sombrías dos beirados. 

Ademais desa luz, é de destacar o naturalismo con que transcribe a minuciosa calidade dos materiais e texturas das paredes, que nos trae ao recordo obras como La Torre de las Damas en la Alhambra de Granada ou La Aguadora pintadas por  Martín Rico, un dos principais paisaxistas españois da época e que Alfredo Souto posiblemente coñecese pola súa participación nos frecuentes certames nacionais.

Igualmente podemos dicir dos parámetros compositivos que equilibran a horizontalidade das arquitecturas coa verticalidade que define o ciprés de evocación romántica. E, da harmonización que establece entre arquitectura e vexetación enriquecida ademais coa ornamentación floral e presenza de obxectos decorativos realizados tamén con minuciosa técnica. Que é todo elo, o que nos rememora paisaxes de Martín Rico pintados segundo o estilo preciosista que lle inspira Mariano Fortuny.