Virgen con el Niño

A Virxe, de medio corpo e cun manto azul que lle cobre a cabeza e os ombreiros, sostén no seu colo ao Neno e achégao ao seu peito para aleitalo. A iconografía mariana representada nesta obra é a coñecida como Virgo Lactans, responde o tipo da Nai aleitando ao Fillo coñecida popularmente como Virxe do Leite. É no marco do humanismo renacentista cando xorde unha espiritualidade máis intimista que a arte pasa a reflectir con representacións máis humanas e maternais deixando atrás as actitudes solemnes de época medieval. A Virxe Lactante é símbolo da tenrura maternal, que aquí se manifesta coa nai en contemplación amorosa, unha versión que con todo, nos temas marianos, quedou unida á dor do drama, expresado no xesto grave e meditativo da Virxe que presaxia o sacificio ao que estaba destinado o seu fillo. Cun estilo abocetado, destaca o uso dunha pincelada luminosa para reproducir as calidades da pel nunha pintura chea de delicadeza e elegancia que segue as pautas da corrente clasicista que se desenvolveu no barroco italiano.