E elas... Onde están?
- Achegarse a unha visión da historia da arte na que as mulleres son as protagonistas
- Coñecer as dificultades que as mulleres tiveron ao longo da historia para ser recoñecidas profesionalmente como artistas
- Descubrir exemplos de mulleres artistas da antigüidade e da contemporaneidade
- Reflexionar sobre moitas das mensaxes, non sempre explícitas, que as imaxes nos envían
- Promover valores de igualdade e a non discriminación por razóns sociais, raciais ou de xénero
- Fomentar o debate e a reflexión en temas sociais que nos afectan a todos e todas
Que papel xogan e xogaron as mulleres no mundo da arte? Esta será a cuestión fundamental que nos servirá como fío conductor e punto de arranque da visita. Centrarémonos en dous aspectos distintos: a representación artística da muller durante a Historia da Arte e o seu papel como creadora.
Malia que no museo contamos con numerosas obras pictóricas nas que a muller é a protagonista da representación, temos moi poucas onde elas sexan as creadoras. Por que temos tan poucas obras realizadas por mulleres? Afecta isto ao noso xeito de entender o rol que homes e mulleres teñen na sociedade? Por que coñecemos tan poucos nomes de mulleres creadoras? Que podemos facer para cambiar esta situación?
No noso percorrido observaremos obras de distintas épocas e estilos reflexionando sobre a representación feminina ao longo da historia, achegarémonos a mulleres creadoras de gran transcendencia, pensaremos en mulleres importantes da nosa contorna e reflexionaremos sobre as desigualdades que continuamos vivindo hoxe na nosa vida cotiá.
