OBRADOIROS EN FAMILIA: OS ENIGMAS DA ARTE

Un museo é un lugar cheo de historias, curiosidades e misterios incribles. Cada un dos enigmas que se expoñen neste taller trasladaranos a un momento trascendente da Historia da Arte, a un movemento artístico revolucionario ou a un artista destacado que nos inspirará para crear a nosa propia obra.

O obxectivo dos obradoiros Os enigmas da arte é espertar a conciencia artística das familias participantes, creando experiencias que propicien aprendizaxes significativas, cargadas de emoción para que perduren no tempo e iniciar así o camiño de empregar a creatividade e a arte para a vida.

En cada un dos obradoiros traballaremos a través de dúas liñas:

• Descubrir a Historia da Arte e as distintas formas de crear
• Desenvolverse e expresarse artisticamente, explorando diversas técnicas

Datas: Sábados do 19 de outubro ao 30 de novembro de 2024

Horario: 17:30 a 19:00 h

Destinatarios: Familias con nenos e nenas de 4 a 10 anos.

Programación

A falsificación (19 e 26 de outubro, 2 de novembro)
Unha inquietante nota chegou esta mañá ao museo, afirmando que unha das súas obras fora substituída durante a noite por unha falsificación, pero non desvela cal delas é. Axúdasnos a descubrir de que obra se trata para que os expertos do museo poidan confirmar se é orixinal ou copia?
Unha vez descubramos de que obra se trata, utilizarémola como inspiración e referencia para explorar e xogar coa técnica de hapa zome (estampaxe floral xaponesa) e crear a nosa propia creación artística.

Misterioso asasinato nun cadro (9, 16, 23 e 30 de novembro)
Constanza, a campesiña, apareceu morta en estrañas circunstancias, e o comisario apenas ten pistas para descubrir ao asasino.  O que é seguro é que o asasino está entre as persoas que acudiron ao seu funeral.
A obra Marcha fúnebre por unha campesiña, de Eugenio F. Granell, sérvenos de contextualización, eixo lúdico e inspiración para o posterior proceso creativo, no que xogaremos a pasar do 2D ao 3D, a través da creación de esculturas cinéticas.