Pesqueira Salgado, Manuel

Manuel Pesqueira Salgado (Lantañón, Meis, Pontevedra, 1911- Poio, Pontevedra, 1988). Na infancia comeza a pintar de maneira autodidacta. En 1927 trasládase a Pontevedra para estudar Maxisterio e alí intégrase no ambiente cultural, época que coincide coa aparición das Irmandades da Fala, e acode aos faladoiros de intelectuais no Café Moderno ou do Museo de Pontevedra.

Na Guerra Civil é ferido e o seu brazo dereito queda inutilizado polo que durante un tempo ten que reeducar o seu brazo esquerdo para seguir pintando. A súa temática é a do mundo rural: campesiños realizando traballos do campo, canteiros, músicos ambulantes, escenas de romaría ou xogadores de cartas, que realiza dentro da estética granítica e primitivista dos Renovadores galegos do primeiro terzo de século.

Destaca ás veces os trazos irónicos dos rostros ou esaxera o tamaño das mans, que delatan o seu sentimento de identificación cos problemas dos campesiños. Constrúe formas robustas con pinceladas curtas e cunha gama cromática limitada ás tonalidades grises, pardas, azuis, brancas e negras, introducindo nas súas últimas creacións o efecto do espello para buscar a ambivalencia dos personaxes e dos obxectos que ofrecen diversos puntos de vista.