Ribera, José de
José de Ribera (Xàtiva, Valencia, 1591-Nápoles, 1652). Ribera foi tamén coñecido en Italia, onde desenvolveu a maior parte da súa carreira, polo alcume do Españoleto. En 1613 aparece instalado en Roma, e relacionado coa Academia de San Lucas, o que lle permitía estar en estreita relación cos artistas, procedentes, polo xeral, de Francia e os Países Baixos, comprometidos entón no desenvolvemento dos usos lumínicos de Caravaggio en clave de vigoroso naturalismo. Algunhas das súas primeiras composicións confirman esta adhesión aos aspectos do caravaggismo máis intenso e de maior sinal realista. En 1616, despois de ser nomeado académico de San Lucas, trasladouse definitivamente a Nápoles e empezou a recibir importantes encargos, non só do propio vicerrei e outros nobres españois, senón tamén de ilustres comitentes e coleccionistas italianos, e tamén estranxeiros. O proceso de enriquecemento cromático e dulcificación expresiva, coincidiu cunha progresiva adhesión do pintor ás recentes tendencias do neovenetismo na área mediterránea (entre Roma, Xénova e Palermo), e cunha maior atención dirixida aos exemplos da pintura veneciana do século XVI (a Tiziano en particular). No ámbito desta tendencia recorría a solucións dun rico pictoricismo, de tons cálidos e cada vez menos sombríos. Nas súas obras predominan os temas relixiosos, aínda que tamén realiza series de esmoleiros e filósofos da Antigüedad, ou escenas inspiradas na mitoloxía clásica.
