La Guapa

A obra de Mateos está marcada polo expresionismo que aprende nas súas viaxes por Bélxica e Alemaña, pero que tamén ten raíces hispanas: Goya no pictórico e Valle Inclán, entre outros, no literario. A súa arte representa un mundo de figuras caricaturizadas, de seres humanos en actitudes carnavalescas. A cor e o debuxo son a estrutura da obra. Hai acumulación e superposición de cores, aínda que ás veces recorre a trazos negros para separalos. A forza expresionista da cor é congruente con ese mundo fóra da realidade. Diante da guapa, sitúanse dúas máscaras burlescas, que centran a nosa atención. Non é unha escena de algarada de entroido, máis ben son seres pasivos, pero percibimos un aire sarcástico nas súas andanzas e unha certa desazón entre tanta deformidade.