Retrato de Avelina Torras Serratacó

O retrato foi realizado cara ao ano 1947, cando Sotomayor cunha traxectoria consolidada e convertido nun pintor de éxito, alterna as actividades no Museo do Prado cos múltiples encargos da burguesía do momento, especialmente retratos. Conserva o sinal do realismo académico pero acentuando a pincelada impresionista no xogo de contrastes lumínicos da vestimenta da figura. Usa recursos habituais que utiliza noutros retratos como o elemento arquitéctonico que serve de fondo á retratada ou a abertura ao lado dereito pola que se divisa a paisaxe. A composición deste retrato feminino é reflexo da estética persoal do pintor na que se combinan a naturalidade coa elegancia e un certo grao de idealización.