Xuízo Final

Na parte superior sitúase o tribunal celestial no que aparece Cristo Xuíz sobre a bóla do mundo cando retorna ao fin dos tempos. Está flanqueado pola Virxe e san Xoán Bautista axeonllados, ambos os dous no seu papel de intercesión en favor dos pecadores e que conforman o tema da Déesis (do grego, pregaria ou súplica). Situados nun plano intermedio, os anxos dan o sinal da Resurrección facendo soar as trompetas que espertan aos mortos e o arcanxo san Miguel realiza a pesada das almas. No plano inferior, os elixidos son guiados por un anxo e os condenados son atormentados por demos. Conducidos uns cara á dereita e outros cara á esquerda de Cristo, tal como se relata no evanxeo. Ao fondo a lagoa Estigia, unha imaxe que reflicte a herdanza clásica e que designaba o lugar ao que, segundo a mitoloxía grecorromana, eran conducidas as almas dos defuntos. A fonte que inspirou aos artistas desde o século XIV para representar o Xuízo Final foi o Evanxeo de san Mateo (Mateo, 25, 31 e ss). Desde entón, para aludir ao carácter redentor do Cristo evanxélico, que substitúe ao Cristo xusticeiro da Apocalipse. Acompáñase de anxos que portan os instrumentos da Paixón, as Armas Christi: A columna da flaxelación e a coroa de espiñas que se sitúan neste cobre á dereita e a cruz e os cravos á esquerda, para simbolizar o seu triunfo sobre a morte e o pecado.

No reverso da lámina metálica aparece acuñado o selo que corresponde á marca do fabricante da prancha, Peter Stas (Anveres, ca. 1565-ca. 1616), que marcaba as pranchas de cobre cun corazón e as letras PS no interior coroado por unha cruz rematada nun catro, xunto coa man característica da cidade de Anveres, colocada polo encargado do concello para certificar a calidade do soporte e que era apto para usar. Esta marca de Peter Stas era a fórmula habitual que usaba para sinalar os seus soportes entre 1603 a 1607. (Dato extraído de: Ana Diéguez- Rodríguez / René Jesús Payo Hernanz: Catálogo de Exposición Cobres de Flandes en Castilla. Los Misterios del Rosario de Otto van Veen del retablo del hospital de Briviesca (Burgos), Fundación Museo de las Ferias, Medina del Campo, 2023)