II CICLO "MUSEOS DE CINE"

Iniciamos unha nova edición deste ciclo de cinema, tanto de documental como de ficción, que pretende descubrirnos as salas dos museos, as galerías de arte, a actividade que alí se realiza e o papel dos seus protagonistas, para que así, transportados pola mirada do autor, podamos coñecer a tremoia que se esconde tras estas grandes e/o pequenas institucións culturais. Convidámosvos a compartir connosco esta apaixonante viaxe.

Datas: Mércores, 2, 23 e 30 de abril de 2025

Horario: 19:30 horas

Entrada libre ata completar aforo

Programación

2 de abril
El gran Museo (Austria 2014) 94 min.
Dirección e guión: Johannes Holzhausen
Fotografía Attila Boa, Joerg Burguer

Este potente documental móstranos a vida dentro do Museo de Historia da arte de Viena, unha das pinacotecas máis importantes do mundo, que foi construída, imaxinada e inaugurada polos Habsburgo en 1891. O director non só ilústranos coas obras de arte, senón que segue no seu traballo diario aos conservadores, administradores, técnicos e a gran parte do persoal do Museo convidándonos a reflexionar sobre a engrenaxe que o mantén vivo. Foi galardoada no Festival de Berlín.

23 de abril
The Square (Suecia 2017) 151 min.
Dirección e guión: Ruben Östlund
Fotografía: Fredrik Wenzel
Reparto: Claes Bang, Elisabeth Moss, Dominic West

Cinta gañadora da Palma de Ouro en Cannes no ano 2017 e do Goya a mellor película europea en 2018. Poderosa e perturbadora crítica á sociedade actual e á vez irónica, sarcástica e divertida. Personaxes peculiares e extravagantes que saltan de hilarantes escenas a situacións cargadas de incomodidade para situar ao espectador fóra da súa zona de confort.

30 de abril
Francofonía (Francia, Alemania e Países Baixos 2015) 85 min.
Dirección y guión: Alexander Sokurov
Fotografía: Bruno Delbonnel
Reparto: Louis-Do de Lencquesaing, Vicent Nemeth, Johanna Korthals Altes

Ambientada no Paris de 1940, a cinta servíndose de imaxes documentais, de ficción e rodadas en diferentes soportes, propón unha mirada sobre a arte e o poder, co Museo do Louvre como lugar de referencia. Todo iso co pano de fondo as conversacións entre o oficial responsable da xestión cultural durante o 3º Reich e o director francés do Museo, En palabras do seu director “Francofonia é máis unha colaxe que un percorrido cronolóxico que segue os meandros dos cambiantes procesos da mente”.