Busto de Ramón Goy de Silva

Busto do escritor galego situado sobre un alto pedestal. Seguindo a tendencia dos seus retratos de personaxes históricos nos que alonga o canon das figuras, a cara é moi alongada, cunha ampla fronte, e o pelo cara atrás. Destaca unha gran man apoiada sobre o seu peito, coa que sostén un libro no que está tallado o título dunha obra do escritor, A Raíña Silencio. O rostro do escritor adquire unha enorme expresividade a través da mirada penetrante e uns trazos moi marcados, relacionada en certo xeito co expresionismo que o escultor coñeceu nas súas viaxes por Europa. A escultura mostra ademais una das características do artista en canto á súa forma de traballar, xa que se percibe o traballo directo da gubia ao tallar a madeira.