Cabeza de muller

Na obra de Lago a presenza feminina gaña protagonismo como tema a medida que se penetra na súa faceta puramente figurativa, ata adquirir entidade propia e conformar algunhas das series máis representativas da súa produción. Os seus retratos parecen estar sempre distantes, coa mirada perdida, sen contacto co espectador e nos que, por suposto, borrou calquera signo de individualización. A neutralidade formal que caracteriza a este autor tamén está presente nestas composicións, ben cando individualiza á figura en actos cotiáns ou cando se trata de figuras illadas como a que está representada no lenzo.