A danza

No centro da composición tres figuras en actitude danzante, unha muller vestida con zuecos, saia e enaguas, camisa, dengue e pano na cabeza. Rodéana dúas figuras masculinas, ambos con calzón marrón, camisa avermellada e monteira. Na parte inferior do papel está representado un cordeiro de cor branca. O fondo sobre o que se recortan as figuras está decorado con motivos vexetais. Na década dos anos vinte Castelao cambia a súa concepción estética incorporando á estética modernista a influencia das innovacións dos artistas que traballan para a escenografía dos ballets rusos, que tiñan unha vocación integradora do popular cun concepto vangardista no que destaca o uso das cores puras e planos. Este debuxo hai que poñelo en relación con esa influencia que tamén inspira outras obras súas da década dos anos trinta.

É posible que este debuxo sexa un bosquexo, teniendo en cuenta a similitude das figuras e da composición da escena, con bosquexos realizados para ilustracións de libros e escenografías. (Ilustracións en Fraguas e Fraguas, Antonio (1985): O Traxe galego. Catalogación arqueolóxica e artística de Galicia do Museo de Pontevedra, Fundación Pedro Barrié de la Maza, pp. 104-107, 110).