Home estrutura

Dentro da obra de Alfonso Costa a representación do home e todas as súas accións constitúen un tema fundamental e recorrente; representa á figura humana como unha criatura irreal, máxica, dentro dun mundo onírico, froito da súa imaxinación. Home-estrutura, é unha obra realizada en Barcelona en 1974, que podemos enmarcar dentro da súa cuarta etapa que comezaría cara a ese mesmo ano, dentro dun surrealismo persoal. Nesta obra advírtese a utilización dunha realidade deformada como medio de expresión, a figura irreal co perfil desdobrado, é unha criatura fantástica, froito da dualidade entre o soño e o real, este tipo de seres diferentes e máxicos serán unha constante na súa obra, consolidando unha linguaxe persoal.