Lavandeira

A pintura de realismo social rexeita o exótico e o sentimental da corrente romántica do século XIX. Quere mostrar a vida cotiá da sociedade e con iso dá entrada a temas referidos ao mundo do traballo diario: campesiños, obreiros, emigrantes, lavandeiras ou floristas nos que, en ocasións, móstranse as duras condicións de vida.

A poboación rural trasládase aos núcleos urbanos en desenvolvemento e debe buscar novos medios de subsistencia. Entre as mulleres, dada a escasa formación recibida, un dos empregos máis modestos era a asistencia nas tarefas domésticas.

A escena que pinta Modesto Brocos remítenos ao espazo doméstico e está asinada en Madrid en 1880, na etapa na que volve de París a España para formarse na Academia de Belas Artes de San Fernando. As dúas mulleres están caracterizadas de forma diferente, a vestimenta e a actitude desenfadada da muller sentada contrasta coa figura da lavandeira, apoiada sobre unha táboa de lavar. De pé e resaltada pola luz da ventá, ten o rostro visible e mostra nos seus xestos unha expresión humilde e contida.