María Luisa de Orleáns

CÍRCULO DE PIERRE MIGNARD

Retrato de dama nova en tres cuartos. Viste un traxe, con adornos de encaixe no escote e a bocamanga, e un manto carmesí. Estende o brazo dereito para coller un caravel dun vaso situado sobre unha mesa. A retratada, María Luisa de Orleáns, sobriña de Luís XIV de Francia, foi reina consorte de España entre os anos 1679 e 1689 polo seu matrimonio con Carlos II. Neste retrato, probablemente pintado con motivo do seu compromiso matrimonial, lógrase a semellanza física co retratada pero non se profunda na súa natureza individual. Trátase dun retrato oficial dun membro da realeza francesa, ao aire libre e seguindo o gusto decorativo e artificioso das composicións alegóricas que introducen accesorios simbólicos como o caravel, que podería significar promesa de matrimonio ou admiración ao consorte. A imaxe reflicte o estilo de Pierre Mignard, un acreditado pintor da corte francesa do século XVII, onde a retratística caracterizouse polas poses refinadas, as siluetas de liñas sinuosas e con predominio da cor que se expresaba nos encaixes e sedas. Unha pintura grandilocuente aínda que matizada pola súa fusión coa vertente clásica do barroco italiano que dá lugar a elegantes estilizacións. Estas características contrastan coas que, na mesma época, expresaban a dignidade non ostentosa do retrato cortesán español: posturas ríxidas, contención expresiva e austeridade cromática.