O seminarista

A composición deste lenzo transmite unha imaxe de irrealidade favorecida polo predominio das cores negra e gris. O personaxe, vestido con roupa negra e acompañado dun can recórtase sobre o fondo dunha paisaxe con ceo escuro que lembra o dramatismo dalgunhas obras de Zuloaga. O canon alongado da figura está especialmente acentuado na súa man esquerda, que xunto co rostro aparecen iluminados por unha luz tenue que destaca a súa palidez e reforza a súa expresión melancólica. Estas características remítennos á etapa na que Corredoyra despois de residir en Madrid volve a Galicia e atravesa unha fase persoal de profundo ascetismo e misticismo.