Paisaxe de Granada

Formado segundo as propostas realistas da época e coñecedor do paisaxismo madrileño de Carlos de Haes, Alfredo Souto vai seguir a senda dunha paisaxe realista que asimila as influencias locais dos diferentes sitios onde se establece para exercer a súa carreira xudicial. Así, a súa estancia en Granada dá título a este retrinco de paisaxe urbana realizada en pequeno formato con asunto tan do gusto da clientela burguesa da época.  

Neste cadro apréciase a diferenza de paisaxes que pinta de Galicia respecto doutras que realiza en Andalucía. A cor desvela a súa localización meridional nos brancos da arquitectura, resaltados por esa incidencia lumínica sobre os seus encalados ou creando contrastes tonais nas zonas sombrías dos beirados. 

Ademais desa luz, é de destacar o naturalismo con que transcribe a minuciosa calidade dos materiais e texturas das paredes, que nos trae ao recordo obras como A Torre das Damas na Alhambra de Granada ou A augadora pintadas por Martín Rico, un dos principais paisaxistas españois da época a quen Alfredo Souto posiblemente coñeceu pola súa participación nos frecuentes certames nacionais.

Igualmente podemos dicir dos parámetros compositivos que equilibran a horizontalidade das arquitecturas coa verticalidade que define o ciprés de evocación romántica. E, da harmonización que establece entre arquitectura e vexetación enriquecida ademais coa ornamentación floral e presenza de obxectos decorativos realizados tamén con minuciosa técnica.