Paisaxe (Marín)

Torres representa unha paisaxe dunha vila mariñeira, probablemente do seu pobo natal, no que recrea as casas e o carácter graduado da contorna. Plasma un pequeno espazo da paisaxe rural galega mediante a solidez das formas volumétricas e xeometrizantes da arquitectura que se acentúan pola distribución dos tons brancos e terras. Estas formas sintéticas dos elementos arquitectónicos fan certa referencia a postulados postimpresionistas e poscubistas. Ademais, inclúe algúns elementos que, máis aló de ser anecdóticos, pretenden achegarse aos costumes do mundo rural, como os tendais de roupa situados nos arredores das vivendas.