Pola patria (Copia)

Tal como indica a firma do cadro (asinado en Madrid), a obra corresponde á época de aprendizaxe do pintor durante a que estudou nesa cidade baixo o maxisterio de Luís Álvarez Catalá, pintor que foi subdirector do Museo Nacional del Prado e máis tarde director do mesmo entre 1898 e 1901. Como se indica tamén na inscrición trátase dunha copia, neste caso do lenzo titulado Pola patria do pintor Juan Antonio Benlliure e Gil (Valencia, 1860 - Madrid, 1930), que obtivo Segunda Medalla na Exposición Nacional de Bellas Artes de 1884 e que pertence á colección do Museo Nacional del Prado. Represénta unha escena na que un soldado acode a entregar aos pais o escapulario e o capote militar do seu fillo morto.