Veleiro

Desde os anos sesenta, os temas na pintura de Lago non variarán demasiado, entre outros, prefire sutís mariñas inspiradas nas súas estancias estivais na Coruña ou no mar e as montañas de Altea, o seu lugar de residencia. Sempre se trata dunha natureza en calma, un horizonte plano que logra fundirse con outros elementos da composición. O uso de transparencias e veladuras que esvaecen a liña de horizonte queda potenciado polo uso de gradacións e matices cromáticos moi sutís na mesma gama de azuis e grises. Todo parece ocultarse tras unha brétema que simplifica as formas e transmite unha certa sensación poética de atemporalidade que logra facer un tanto irreal o momento.