3, 2, 1... Acción!

Que pode dicirnos un corpo que se move? E un que permanece quedo? Por que algunhas figuras parecen bailar e outras esconden as súas mans tras as costas? Todo o que somos pasa polo corpo. O que sentimos, o que calamos, o que imaxinamos.

No museo, os xestos quedan atrapados para sempre en cadros e esculturas que falan sen necesidade de palabras.

Nesta visita, o alumnado mergullarase nunha galería de corpos que, do mesmo xeito que eles, corren, descansan, xogan .. Aprenderán a observar as posturas e expresións como pistas que nos contan que ocorre en cada escena, que sentían os seus protagonistas e que intención tiña o artista ao representalos así.

Pero tamén experimentarán co seu propio corpo: que ocorre cando ocupamos o espazo, como cambia a percepción ao movernos, como se sente ser unha escultura ou debuxar co aire. Porque nesta idade na que o corpo está aínda en descubrimento, a arte pode ser unha vía para coñecerse mellor, para comunicarse sen medo, e para deixar unha pequena obra que fale por nós.

A través de dinámicas participativas, os nenos e nenas descubrirán que tamén eles poden usar o seu corpo para crear. Porque a arte non só se contempla: tamén se vive, interprétase e transfórmase en movemento.

Esta experiencia foi deseñada para favorecer a libre expresión, a aprendizaxe emocional e o desenvolvemento de habilidades comunicativas non verbais, nun formato participativo e cheo de sorpresas. Unha proposta ideal para unha etapa na que se afianzan a expresión corporal, a empatía e a comprensión das emocións humanas.