O misterio da máquina do tempo

Algo saíu mal. A máquina do tempo que debía guiarnos pola historia da arte rompeuse… e as pezas quedaron espalladas polas salas do museo. Só con enxeño, observación e moito traballo en equipo lograremos atopar cada fragmento e recompoñer a liña temporal que nos permitirá entender o pasado.

Esta visita está pensada como unha viaxe lúdica a través do tempo, no que os nenos e nenas de segundo de primaria converteranse en exploradores de estilos, épocas e detalles artísticos. Con cada sala que descubramos, iremos recuperando unha parte do organigrama perdido, aprendendo non só a diferenciar entre obras antigas e modernas, senón tamén a pensar como se organiza un museo e por que o tempo e a historia son esenciais para comprender a arte.

A actividade baséase na participación, a fantasía e o xogo simbólico, permitindo que o alumnado desenvolva o seu sentido cronolóxico á vez que se familiariza co patrimonio cultural. Unha proposta perfecta para introducir, sen perder a maxia, conceptos como a liña do tempo, a evolución das formas artísticas ou o valor do museo como gardián do tempo humano.