O Museo co Día das Letras Galegas
Ricardo Carvalho Calero (1910-1990) e Tomás Barros (1922-1986) mantiveron unha profunda amizade desde que se coñeceron en Ferrol. Cara a 1948, Carvalho Calero anima a Tomás Barros e a Miguel Carlos Vidal a cofundar e editar unha revista literaria de poesía e crítica que denominaron Aturuxo.
O primeiro número sae no verán de 1952 e, grazas ao apoio de Carvalho Calero, participaron con poemas artistas como Otero Pedrayo, Luís Pimentel, Álvaro Cunqueiro, Ramón Cabanillas, Luz Pozo Garza, Pura Vázquez, Angel Johan e Ramón González-Alegre Bálgoma.
El poeta Carballo Calero y yo. Lugo, 29-IX-56
Agradecemos a Margarita Carballo-Calero Ramos a cesión para esta actividade conmemorativa da imaxe deste retrato do seu pai, realizado en 1949 por Tomás Barros, artista representado na colección do museo grazas ás obras doadas recentemente polo seu fillo, Tomás Barros Cao.
Retrato de poeta
Detrás dun tabuleiro,
detrás dun tabuleiro
vermello, cuja xerfa
peitan, coas suas rabelas ou quillas,
peixes verdes en ringla, e na que jacen
unha mazá docemente mordida
e un dado -cubicada sorte ou
cuadratura fatal-,
sentado, está o poeta.
Sobre o brazo do asento,
un cóbado, e a man depondorada;
entre o polegar e o índice,
un anaco de ar
onde houbo algo que se foi,
do que a gema dos dedos ten
saudade.
A branca americana
de candidato á pretura do inferno;
o colo, baixo o pudor da camisa,
enforcado pola gravata azul;
e a chola monda,
que o leme do nariz conduz de
esguello,
pesada, dura e triste,
nun aceno de séria
produra, aceda e cansa.
Sobre un fundo de pontes, onde hai
árbores
que retorcen os brazos como
espiritados, árbores
de roxos froitos.
Retrato de Ricardo Carvalho Calero, Tomás Barros, 1949
E un ollo de loito viola o pecho azul.
Adán e Eva,
dous monifates de pintado azúcar,
aspergidos de follas e mazás,
parolan baixo as ponlas prohibidas,
cinguidos pola serpe.
E as orellas do poeta
medran atal as dun sátiro triste
no seu rostro de lama
cujos ollos ja leron os oráculos
e cujas moas ja non roen a vida
como a carne dun deusa cazada
na fraga do solpor.