Abertura horizontal

Abertura horizontal, pertence a unha longa e frutífera etapa da produción de Silverio Rivas, que nace como consecuencia da súa experiencia, trasladada ao bronce, coa cerámica articulada que comezou a realizar por mor da súa estadía na fábrica de cerámicas de Sargadelos durante os anos 1976 e 1977. Nesta serie de obras descobre que a posibilidade de apertura lle permite acceder ao interior dos volumes; unha procura que levou implícito un complexo proceso tecnolóxico e investigador. A peza, que transita dende a posición pechada ata diversas opcións de apertura, vai xerando múltiples posibilidades estéticas, formais e expresivas, á vez que permite ao espectador a súa manipulación, partindo do momento estático para descubrir un crecemento dinámico nas súas diversas posibilidades de mutación. Trátase dunha peza poliforme, coma se fosen varias esculturas nunha.