Carlos I de Inglaterra en tres posturas

COPIA DE ANTON VAN DYCK

Retrato de Carlos I de Inglaterra de medio corpo e en tres posturas: de fronte e dúas de perfil. Viste de negro, vermello e lila sucesivamente, con valona branca bordada. No brazo do busto situado á dereita aparece parte da estrela de oito puntas que é un emblema unido á Orde da Xarretera, unha das ordes de cabalaría máis antiga do Reino Unido. A imaxe de Carlos I de fronte, perfil e tres cuartos, foi encargada a Van Dyck coa finalidade de enviala a Bernini para que executase un busto en mármore do monarca. A obra orixinal pintada por Van Dyck cara a 1635-1636 forma parte da Colección Real inglesa.