Cuspideira

Cuspideira estampada en negro, con asa e con molduras redondeadas e lixeiramente destacadas na base e parte superior.

O recipiente está decorado por motivos centrais con xardíns fantásticos do modelo Góndola; a tapa superior de forma cóncava e con perforación central decóraa a orla tipo Góndola que alterna viñetas de paisaxes e rosas, unidas no interior por un reberete de espigas que tamén se repite na asa. 

Esta cuspideira serve para exemplificar non só a diversidade de modelos obxectuais que saían de Sargadelos para unha mesma función, senón tamén para mostrar a variedade de obxectos de uso hixiénico que podían chegar a formar parte dun enxoval doméstico.