A dama das luvas grises

Retrato de muller en tres cuartos. Apoiada sobre o marco da xanela vira o rostro ao fronte continuando o devandito xiro cara á esquerda mediante a súa mirada. Loce vestido azul de manga longa, con sobreposición de colo e abertura do antebrazo en plisado. Tocada con chapeu agrisado de á volta e forma plisada sobre o que cae unha ampla pluma. Coa súa man dereita enguantada suxeita un abano pechado. Un tramo de parede e unha cortina verde, ambos os dous con estampados vexetais, acoutan o interior da estancia onde se atopa a retratada. A xanela dá paso a unha panorámica con paisaxe de montaña limitada ao lonxe por unha celaxe encapotada. O estilo da pintura de M. Brocos encádrase nun naturalismo ecléctico que percorre as diversas tendencias vixentes na pintura oficial europea nos anos finais do século XIX. Esta obra responde a esa concepción naturalista onde resalta a composición de claro corte académico.