A dama do papagaio

Neste retrato realizado por Corredoyra en Nova York, usa un dos seus característicos fondos sombríos disposto a modo de escenario teatral no que representa as arcadas dun claustro que evoca o pasado medieval. E en contraste con este marco arquitectónico, unha figura feminina aparece en primeiro termo destacada por unha iluminación de aparencia irreal.

Nesta muller que parece absorta nos seus pensamentos destaca a expresión da súa mirada, cos ollos entreabertos e mirando de esguello, resaltada pola cor esbrancuxada da maquillaxe. É o tipo de muller sedutora, con tinguiduras de perversidade, moi utilizado na estética simbolista. O aire de misterio e a sensualidade que desprende a figura, reforzada co paxaro exótico que sostén na súa man, lembra aos tipos femininos de Julio Romero de Torres.