Desnudo

Figura de muller de medio corpo, sentada de perfil e espida. Germán Taibo, tras unha estancia en Buenos Aires, en 1906 trasládase a París onde completa a súa formación artística e desenvolve toda a súa actividade pictórica ata que lle sorprende a morte. É un momento en que en París triunfa a moda impresionista e Taibo é coñecedor das súas técnicas, e será sobre todo un gran admirador da pintura de Manet especialmente dos seus modos de representar os espidos femininos que transmiten unha imaxe do corpo máis real e próximo, afastado desa imaxe idealizada da pintura europea da segunda metade do XIX.

A pesar de que a arte española decimonónica contaba cunha parca representación do espido, durante o primeiro terzo do século XX alcanza un gran desenvolvemento nos máis variados estilos. Germán Taibo aínda que fincado en París, contribúe ao seu despregamento facendo uso dunha técnica moderna de matices impresionistas pero aplicada a unha figuración que se mantén aínda realista.