Eccehomo

ATRIBUIDO A LUIS DE MORALES

A figura de Cristo, de menos de medio corpo e coa cabeza ladeada cara á súa dereita, está situada sobre un fondo en penumbra. Esta imaxe vén plasmar a expresión Eccehomo, que é a forma latina do anuncio de Pilatos: Aquí está o home, cando presentou a Xesús ao pobo para coñecer o seu veredicto. Seguindo os relatos evanxélicos, Cristo suxeita entre as súas mans atadas unha cana a modo de cetro, e leva o manto púrpura e a coroa de espiñas que os soldados romanos lle colocaran como burla para comparalo cun rei terreal. A imaxe de Cristo doente respondía plenamente aos ideais da Contrarreforma católica xa que reflictía a faceta humana do Fillo de Deus e pola súa grande emotividade convidaba á compaixón e a meditación dos fieis. A figura do eccehomo, solitaria e ante un fondo escuro, con efectos de contraste de luz e sombra, foi frecuente na pintura de Luis de Morales. O artista, recorre ao formato de medias figuras, para crear un tipo de imaxe moi apropiada para satisfacer a devoción da súa clientela devota e na súa maior parte do ámbito clerical e habitual na súa produción, xa que se coñecen varias versións do mesmo tema. O seu peculiar estilo, que foi imitado no seu propio taller de Badaxoz e polos seus discípulos, fusionaba influencias da pintura de Flandres que se observan no emprego da madeira como soporte da súa pintura e no detallismo do tratamento do cabelo, con influencias da pintura italiana como o esvaecido dos perfís e a creación dunha atmosfera ambiental nos seus cadros.