Emigrante

Sen abandonar o protagonismo da figura feminina, entendida como emblema do ser de Galicia, cuns trazos simples define o corpo desta muller sentada, de fronte e coas mans sobre o colo. Sobre o peito ten un cartel no que está escrita en francés unha lenda cos datos que a identifican: ELLE S`APELLE / MANUELA RODRÍGUEZ / ELLE EST ANALPHABÉTE / AIDEZ - A / GENÈVE 1963. Con esta obra Seoane denuncia unha realidade social da época, a emigración e o analfabetismo. Cando Seoane volve a Europa nos anos sesenta e toma contacto coas novas tendencias figurativas e abstractas, renova a súa concepción das formas a base da autonomía da liña e da cor plana que desembocará nun proceso de esquematización das formas e de simplificación, como a que observamos nesta imaxe feminina, que ocupa a superficie do lenzo e á que dota de gran simbolismo.