La parva

Personaxe masculino sentado sobre un tronco co corpo botado cara adiante e virando a cabeza cara á dereita. Leva vestimenta tradicional: gorro de la na cabeza, camisa, chaleco, faixa, calzón con aberturas e polainas. O campesiño representado sorrí con retranca e está a realizar unha comida lixeira que tradicionalmente se tomaba a media mañá, consiste nunha copa de augardente e un anaco de pan a modo de primeiro almorzo popularmente coñecido como a parva. A obra coincide co momento en que Brocos se instala na Coruña como profesor na Escola de Belas Artes. A escultura de xénero foi o máis interesante da produción de Brocos e en relación con iso, non podemos esquecer o movemento rexionalista que se estaba fraguando e que aparece nas súas obras ligado a unha certa preocupación de índole social. Brocos realizou un busto (O vello da parva) datado en 1887 que representa ó modelo masculino da parva e un estudo preparatorio da cabeza do vello da parva, (Catálogo: Isidoro Brocos (1841-1914), cat. nº 6 e 7, pp. 99, 100).