Ligereza y atrevimiento de Juanito Apiñani en la de Madrid.

O título orixinal de Goya, Saltar el toro con palo, modifícase tras a intervención de Ceán Bermúdez e a identificación dos protagonistas e o lugar.

A estampa destaca pola súa mestría no modo de reflectir o dinamismo a través duns trazos esenciais. A súa inmediatez e a equilibrada composición no centro queda focalizada polo grupo principal do touro e o toureiro, e pola destreza de Goya ao apiñar aos espectadores na parte esquerda da composición deixando baleiros o resto dos tendidos, recurso visual que nos transmite esa sensación de calor sufocante no ambiente.

Fronte ao dramatismo doutras composicións da Tauromaquia, esta posúe unha elegancia e sutileza extraordinaria, froito tal vez do tipo de lance onde non se chegaba a dar morte ao touro e o drama quedaba circunscrito na acción arriscada do toureiro.