Mambrú

Denomínanse como Mambrú en Galicia ás xerras producidas na Fábrica de Sargadelos no século XIX que adoptan a figura dun home sentado nunha cadeira de brazos, coas mans sobre os xeonllos e xeralmente vestido con levita azul ultramar, chaleco amarelo, calzas brancas e pantalón e zapatos negros. O chapeu tricornio, tamén negro, forma un pico de vertedura e, a asa de suxección está na parte posterior.

Este tipo de xerra é unha adaptación da figura de louza inglesa, o Toby Jug (Xerra Toby), cuxa creación se atribúe ao oleiro Ralph Wood de Burslem, Staffordshire, na década de 1760. A súa forma representa a un home riseiro e sentado, ataviado  cunha  colorida vestimenta do século XVIII, que sostén unha xerra de cervexa cunha man e coa outra unha pipa de tabaco. É coñecida tamén como Toby Philpot xa que se cre que esta produción cerámica se inspira nun personaxe literario con ese nome. A produción destas xerras estendeuse por outras olerías europeas que, con algunha variante, contribuíron a popularizalas.

Na Fábrica de Sargadelos existiron estas xerras desde o inicio da súa produción. Co tempo a figura aumenta de tamaño, perde o sorriso e aparece máis hierática. Estes exemplares, salvo casos illados, non adoitan levar a xerra de cervexa nas mans, e algúns teñen no chapeu unha tapa extraible. O termo Mambrú que se aplicou a estas xerras é a posible transformación fonética do apelido do famoso xeneral inglés Duque de Marlborough.