Marina

Esta panorámica da costa coruñesa foi posiblemente realizada pouco antes da súa viaxe de formación a Madrid. O pintor opta por un tema convencional, un fragmento de costa para desenvolver a súa obra. Tecnicamente, o pintor constrúe os elementos da paisaxe con perfís nítidos un tanto matizados pola característica atmosfera brumosa. Un primeiro termo detallado con grandes rocas ante as que rompe a ondada. Toques prateados da auga da ría no plano medio e fondos dourados sobre a barreira montañosa que forma a liña do horizonte na que resalta a veta branca de Seixo Branco e a praia de Mera.