Marinero

Neste cadro de pequeno formato e apaisado Brocos achéganos a unha paisaxe costeira que desprende gran realismo grazas ao retrinco desa escena cotiá mariñeira que presenta nun primerísimo plano, definida polo canastro e centrada por unha figura que, aínda en escorzo, nos transmite unha pose de gran naturalidade. Actitude esta que Brocos explicita igualmente no aspecto natural e casual que emiten as rugosidades e pregues da indumentaria, construídos a base de contrastes tonais das cores e que outorgan ao conxunto unha gran luminosidade e frescura.

Todos estes efectos Brocos lógraos grazas ao seu coñecemento das tendencias modernas que fraguan en Europa os macchiaoili italianos ou os impresionistas franceses coa súa maneira de usar a cor e reflectir a súa luminosidade.