Laxeiro

Lalín (l)
-
1908
Vigo (m)
-
1996

José Otero Abeledo (Laxeiro) (Don Ramiro, Lalín, 1908-Vigo 1996). Pasa a súa mocidade en Cuba, onde vai con 13 anos para reunirse co seu pai, alí traballa en diferentes empresas, sendo unha delas un taller de vidreiras emplomadas. Regresa a Galicia en 1925 e comezará a traballar de barbeiro, ademais de colaborar con diversos xornais. En 1930 entra en contacto cos Renovadores, xa que coñece a Carlos Maside e a Luís Seoane, participando con eles en diferentes faladoiros. En 1931, solicita unha bolsa á Deputación de Pontevedra, que lle é denegada, polo que Lalín, a súa cidade natal, concédelle a bolsa para ir estudar a Madrid, na Escola de Belas Artes de san Fernando. Tras o estalido da Guerra Civil, é soldado forzoso na fronte de Asturias, onde coincide con Celso Emilio Ferreiro, durante os anos 1937-1939, ata que regresa a Pontevedra en 1940. Tras algúns anos de actividade expositiva decide marcharse, xa que Galicia quedaba illada de toda innovación artística.

Entre 1951 e 1964 vive en Buenos Aires, un período que marcará a súa obra cun proceso de eliminación de elementos naturalistas, descompoñendo as formas figurativas, retorcéndoas e diseccionándolas nunha linguaxe que asume influencias do Picasso da década dos 30. Regresa a Galicia a principios dos anos setenta, onde permanece ata o seu falecemento en 1996. Na súa obra, soubo sintetizar a identidade cultural de Galicia coas correntes renovadoras das vangardas que percorreron o século XX. Desenvolve unha serie de temas inspirados en Galicia, cuestións antropolóxicas, contos e lendas, recreando universos máxicos e trasmundos populares. O seu estilo evoluciona do aspecto pétreo das primeiras obras, propio da influencia do románico e dos canteiros galegos, xunto co uso de tonalidades terrosas e negros e liñas curvas, cara a pinturas de liñas rectas e linguaxes abstractas.

Obras do/a autor/a

Outras obras do/a autor/a neste museo

  • Cristo y dos paisanos (#6455 - Cuadro - Lienzo - Pintura al óleo)
  • Maternidade (#6449 - Cuadro - Papel, Tinta - Acuarela)
  • Rezando (#165 - Cuadro - Lienzo - Pintura al óleo)