Arellano, Juan de
Juan de Arellano (Santorcaz, Madrid, 1614-Madrid, 1676). Foi un artista especializado fundamentalmente nos cadros de flores. En Madrid traballa no taller de Juan de Solís. As súas primeiras influencias recibiunas dos exemplos flamengos, especialmente de Daniel Seghers, grazas ao cal soubo dotar ás súas obras dunha técnica meticulosa e preciosista que sempre conservou. Máis adiante, nas súas obras pódese apreciar a influencia de Mario Nuzzi, a quen acabará por superar nas súas composicións de colorido luminoso e transparente. Comercializou as súas propias obras, ao parecer con moito éxito, nun establecemento en Madrid onde as súas obras foron coñecidas e adquiridas por gran número de nobres. O máis frecuente da súa produción son os floreiros de vidro ou de materiais ricos e, aínda máis habitualmente, cestiños de vimbias sobordando rosas, tulipanes, lirios, xasmíns e outras flores, acompañadas ás veces de insectos ao modo flamengo. Tense noticia da súa colaboración con outros artistas que realizaban as figuras que Arellano rodeaba coas súas composicións florais, como é o caso de Francisco Camilo e Mateo Cerezo. Continuador do xénero de flores foi o seu xenro Bartolomé Pérez de la Dehesa.
