Don Quixote. Aventura do titiriteiro e adiviñas do mono adiviño
Folla técnica
EXPOSICIÓNS:
Ano 1985. Lugar: A Coruña. Colexio Calvo Sotelo. 1- 15 de Agosto. Exposición homenaxe ao artista Isidoro Brocos. Deputación Provincial da Coruña.
Obra restaurada
O laboratorio de conservación e restauración do Museo de Belas Artes levou a cabo o tratamento da obra Don Quixote. Aventura do titiriteiro e adiviñas do mono adiviño.
Estado de conservación
Placa de barro cocido aparafusado e pegado a un soporte de madeira de tres pezas. A obra estivo fragmentada e foi reconstruída. Presenta varias gretas e nalgunhas delas aprécianse restos de adhesivo envellecido. O barro que tapa os parafusos, ademais de estar debilitado adquiriu unha coloración marrón avermellado procedente da oxidación dos mesmos. Toda a superficie do relevo presenta unha película fina, probablemente barbotina, a modo de acabado final e aplicada de forma irregular.
Proceso de restauración
A intervención consistiu nunha limpeza da sucidade superficial, retirada dos restos de adhesivos envellecidos, encolado de fragmentos desprendidos, limpeza e protección dos elementos metálicos, estucado das gretas e reintegración cromática con acuarelas.
Recréase visualmente o interior dunha estancia, que corresponde á escena do Quixote (Parte II. Cap. XXV- Aventura do titiritero e adiviñas do mono adiviño) desenvolta nunha venda. No centro, aparece don Quixote sentado nun banco, vestido con helmo e armadura, e apoiando os seus brazos sobre unha espada. Unha serie de personaxes rodéano con expresión de asombro ao escoitar a Maese Pedro que, acompañado por un mono, revélalle a súa identidade ao protagonista, explicando que o animal adiviña todo o pasado e presente: [...Estas pernas abrazo, ben así como abrazase as dúas columnas de Hércules, oh resucitador insigne da xa posta en esquecemento andante cabalería, oh non xamais como se debe encomiado cabaleiro don Quixote da Mancha...]
O escultor mantivo a descrición recollida na novela para caracterizar ao titiritero e aos demais personaxes, cuxa indumentaria (xubóns, greguescos, medias, calzóns, gola e outros complementos), reflicte con gran verismo o estilo da época. Na colección do museo gárdase un debuxo (núm. inv. 5740) que posiblemente sexa o bosquexo para esta placa de barro. Está reproducida na publicación Centenario do Quixote en Galicia, que a liga de Amigos da Coruña realizou en 1905 con motivo do III Centenario da publicación da novela de Cervantes.