Epílogo

Vista de conxunto do interior dunha fábrica de metalurxia na que o pintor, cunha linguaxe directa e a modo de reporteiro, plasma o momento en que un obreiro ferido/morto é retirado da contorna fabril. E ademais, facendo uso dunha paleta escura e gris recrea con todo verismo o interior da fábrica deixando ver a crueza do traballo nos curtidos obreiros e a súa resignada aceptación dun destino tráxico, ademais de deixar rexistrada a temperá incorporación dos nenos ao mundo laboral nese momento.

Cutanda é un artista moi interesado polo proletariado que chega ás zonas industriais do País Vasco, ao que vai converter en protagonista de moitos dos seus cadros. A súa obra de tema laboral, especialmente da metalurxia, é unha das máis representativas do realismo social español do século XIX.