Retrato de árabe

Figura masculina con turbante branco e coas mans apoiadas na empuñadura dunha espada.

Román Navarro ademais de pintor de escenas militares e prestixioso retratista de efixies de gran tamaño e empaque de membros da realeza, políticos ou eclesiásticos, tamén realiza pequenas obras como este retrato de busto que entronca coa faceta costumista do artista onde recrea impresionantes tipos e caracteres populares.

Neste retrato de árabe transcríbenos con gran naturalismo o abatemento psíquico do individuo a través dun rostro que, á vez, está en perfecta harmonía coa flaccidez das mans plasmando o conxunto unha extraordinaria aparencia da súa decrepitude.

Algún autor indicou que a relación de Román Navarro durante a súa estancia como profesor na Escola de Artes e Oficios da Coruña co seu alumno Pablo Ruiz (Picasso) recentemente chegado a esta cidade puido influír, a teor da vestimenta deste retratado e da súa postura, en óleos pintados por Picasso na súa mocidade na Coruña como é o caso dos retratos dun home barbudo ou o de Modesto Castela disfrazado de mouro.