Retrato de D. Juan Nepomuceno Jaspe Montoto

Este retrato de Juan Nepomuceno Jaspe Montoto forma parella co cadro que retrata á súa esposa Dna. Carmen Moscoso de Altamira, quen á súa vez son pais do pintor Antonio Jaspe Moscoso.

Seguindo a liña do seu mestre Federico Madrazo, Fierros fai uso dunha modalidade retratística de parella de esposos moi demandada na época polas elites aristocráticas e burguesas. En ambos os cadros os retratados aparecen dispostos na proximidade, de fronte, en tres cuartos e en posicións encontradas pero difiren con todo na ambientación da súa contorna. Aquí, o cabaleiro sitúase de pé a medio camiño entre o interior, intuído unicamente pola mesa e a cortina, e o exterior, representado mediante unha celaxe de reminiscencias románticas, nunha actitude distinguida e á vez natural asumindo o rol de autoridade familiar e profesional que lle outorga a división de xéneros da época.

 O pintor utiliza unha paleta de negros de marcada tradición española para representar a este cabaleiro que exhibe unha coidada aparencia na súa indumentaria ao estilo do dandi romántico que estaba tan de moda neste momento.