Visitas

Nos libro-xogos dos anos oitenta e noventa da serie Elixe a túa propia aventura, o lector tiña que ir tomando decisións sobre a forma de actuar dos personaxes da historia, modificando así o transcorrer da narración.

Todos os museos e institucións teñen un espazo coñecido como “oficina de obxectos perdidos”; neste lugar, almacénanse todos aqueles obxectos que os visitantes e usuarios deses espazos deixan esquecidos.

Nesta actividade o alumnado de 1º e 2º de Primaria terá que ir atopando unha serie de obxectos reais que estarán vencellados a distintos cadros do museo. Algúns destes obxectos terán valor económico, sentimental ou serán totalmente funcionais; descubriremos os seus usos e aos personaxes aos que pertencen.

A liña, a mancha e a cor son tres dos elementos principais aos que nos enfrentamos á hora de realizar unha produción artística ou analizala. Pode haber figuras sen liñas? Que tipos de liñas coñeces? Poden as manchas expresar sentimentos? Cantas tonalidades de azul es capaz de recoñecer nunha única pintura? Como e cando xorden as cores? Hai formas abertas e pechadas?

Que pasaría se mañá caésemos desde un avión a unha illa deserta? Que tres cousas escollerías para comezar unha nova vida? Que pegada quererías deixar nesta terra virxe? Como se dun Robinson Crusoe se tratara, o alumnado terá que sobrevivir neste lugar e convivir con outras illas veciñas, atopando un equilibrio entre os intereses de todos os habitantes do arquipélago.

Ao longo da Historia da Arte houbo artistas que tentaron enganar o noso ollo ou agochar certas mensaxes nos cadros. En Outro xeito de mirar descubriremos as distintas lecturas que se lle poden dar a unha obra de arte e interactuaremos coas pezas da colección do museo, empregando todos os nosos sentidos.

Que é un trampantojo? Podemos meternos dentro dun cadro? Que pasa se lle damos a volta a unha pintura abstracta? Percibimos todos e todas o mesmo ante o que estamos a ver?

Que papel xogan e xogaron as mulleres no mundo da arte? Esta será a cuestión fundamental que nos servirá como fío conductor e punto de arranque da visita. Centrarémonos en dous aspectos distintos: a representación artística da muller durante a Historia da Arte e o seu papel como creadora.